Pages

سلطة وسندويتشات دجاج البوب كورن


وصفتي المشهورة اللي اسويها دايماً وكل مرة اجربها مع تغيير بسيط على حسب المتوفر عندي من المكونات
هالمرة سويت كمية للسندويتشات وباقي الحشوة خليتها سلطة
المقادير:
دياي بوب كورن مقلي ومقطع لقطع صغيرة
بطاط مقطع لمكعبات صغيرة ومقلية
جزر مبشور
خس مقطع لشرايح
صلصة ايطالية
مايونيز + خردل (ماسترد) + صلصة الثاوزند ايلاند + صلصة السيزر
توست + جبن شرائح للسندويتشات
سماق لتزيين السلطة

نخلط الدياي والبطاط والجزر والخس مع الصلصة الايطاليه وما نكثر من الصلصة علشان ما يذبل الخس ويتغير طعم الدياي
وفي صحن ثاني ناخذ ملعقة او ملعقتين من كل صلصة ونخلط مع بعض وممكن تزيدون المايونيز شوي وممكن تستغنون عن أي صلصة حسب الرغبة
نخلط الصلصات بالسلطة وبعد ما نكثر علشان ما تذبل الحشوة وما نقلل علشان ما تنشف بعدين
ناخذ التوست ونحط شوي من الخلطة وشريحة جبن وممكن تسخنون السندويتشات في الشواية أو الفرن علشان يذوب الجبن وتلصق المكونات بالتوست

واذا حبيتوا ما تسوون سندويتشات تصير الحشوة سلطة لذيذة وممكن اذا حبيتوا تخلطون معاها جبن تشيدر مبشور وتزينونها بسماق
وبالعافية


ليست هناك تعليقات:

إرسال تعليق